Претставници на проектот „Платформа за граѓанско образование за млади за борба против радикализација (Младите против насилство) потпишаа Меморандуми за соработка со Националниот комитет за спречување насилен екстремизам и борба против тероризмот, Агенција за млади и спорт, како и со средните училишта „Кочо Рацин“ и „Марија Кири – Склодовска“ од Скопје.
На потпишувањето на Меморандумите во хотел „Буши“, присуствуваа националниот координатор на Националниот комитет за спречување насилен екстремизам и борба против тероризмот, Златко Апостоловски, директор на Агенција за млади и спорт Наумче Мојсоски, како и директорите на средните училишта „Кочо Рацин“ и „Марија Кири – Склодовска“, Благица Павловска и Блерим Небиу. Додека со градоначалниците на Чаир и Центар, Висар Ганиу и Горан Герасимовски, кои го поддржуваат проектот, како и со директорот на „Зеф Љуш Марку“ Фарук Зеќири меморандумот дополнително ќе се потпише.
“Меморандумот се потпиша во насока на институционална поддршка и промоција на проектот. Воедно, со оваа активност се создаваат услови за сегашни и идни соработки при обезбедување на подобри услови за живот и развој на младите, обезбедување на стабилно општество отпорно на радикални наративи и говор на омраза, како и промоција на позитивни вредности за изградба на психофизички здрава младина” – изјави Валерија Соколова – Стојановска, Директор на проектот „Платформа за граѓанско образование за млади за борба против радикализација (Младите против насилство).
Националниот координатор на Националниот комитет за спречување насилен екстремизам и борба против тероризмот, Златко Апостоловски ја нагласи потребата од активна вклученост на граѓанскиот сектор во активностите за спречувањето на насилен екстремизам.
„Сметаме дека приодот на граѓанскиот сектор кон ранливите категории, каде спаѓаат и семејствата и луѓето кои се вратија од странските боишта, може да даде поголем резултат од она што во моментов може да го направат владините институции. Но тоа не ја исклучува вклученоста на владините институции. Во делот на образованието имаме направено низа превентивни обуки, особено во однос на превенирање на насилство меѓу младите. На пример она што пред неколку години се случуваше кога младите имаа тепачки по автобуси, сега веќе не станува збор за такви настани, затоа што успеавме да ја подигнеме свеста што е националниот екстремизам и дека сите граѓани имаат придонес во превенирање. Се со цел да Република Северна Македонија биде пристојно место за живеење во кое граѓаните нема да ги деламе по верска, етничка или друга основа, туку да дојде до израз креативноста и индивидуалната способност во реализација на младите и нивните идеи за просперитетно општество“, изјави Националниот координатор на Националниот комитет за спречување насилен екстремизам и борба против тероризмот, Златко Апостоловски.
Директор на Агенција за млади и спорт Наумче Мојсоски изрази поддршка на иницијативата нагласувајќи ја потребата преку нивната вклученост да придонесат и за намалување на насилството меѓу младите, како и во спортските активности.
„Вклученоста на Агенцијата за млади во овие активности е од исклучителна важност, затоа што на навивачки натпревари се случува насилство и ние сакаме да превенираме и да го намалиме во тој дел насилството и екстремизмот. Сме сведоци на немили настани, дали по етничка или друга основа сакаме да го спречиме и да помогнеме младите да не бидат дел од тие случувања“, рече Директор на Агенција за млади и спорт Наумче Мојсоски.
Меморандуми за соработка со Платформата, потпишаа и градоначалниците на Струга и Куманово, Рамиз Мерко и Максим Димитриевски, како и со директори на средни училишта и со претставници на граѓански организации.
Проектот „Платформа за граѓанско образование за млади за борба против радикализација (Младите против насилство) го предводат организациите Здружение на граѓани Иницијатива за европска перспектива (ИЕП), НЕКСУС – Граѓански концепт, Здружение за развој и активизам АКВА, Струга и Центарот за интеркултурен дијалог (ЦИД). Проектот е финансиран од Европската Унија.
